یومِ استحصالِ کشمیر: بہاولنگر میں کشمیری عوام سے اظہارِ یکجہتی، ریلی اور سیمینار کا انعقاد

بہاولنگر (نمائندہ خصوصی) یومِ استحصالِ کشمیر کے موقع پر ضلع بہاولنگر میں کشمیری عوام سے اظہارِ یکجہتی کے لیے ایک پروقار تقریب، سیمینار اور ریلی کا انعقاد کیا گیا۔ اس موقع پر ڈپٹی کمشنر بہاولنگر سید محمد عباس شاہ اور ڈی پی او محمد عمران نے کہا کہ پاکستانی قوم اپنے کشمیری بھائیوں کے ساتھ شانہ بشانہ کھڑی ہے اور کشمیری عوام کی قربانیاں کبھی رائیگاں نہیں جائیں گی۔

انہوں نے کہا کہ پاکستان ہر سطح پر کشمیری عوام کے حقِ خود ارادیت کی اخلاقی، سفارتی اور سیاسی حمایت جاری رکھے گا۔ مقررین نے کشمیری عوام کی جدوجہد کو خراجِ تحسین پیش کرتے ہوئے عالمی برادری سے مطالبہ کیا کہ وہ مقبوضہ جموں و کشمیر میں انسانی حقوق کی مبینہ خلاف ورزیوں کا نوٹس لے اور کشمیری عوام کو اقوام متحدہ کی قراردادوں کے مطابق حقِ خود ارادیت دلانے کے لیے اپنا کردار ادا کرے۔

تقریب کا آغاز پرچم کشائی سے ہوا، جس کے بعد قومی ترانے کی دھن پر سلامی پیش کی گئی۔ بعد ازاں کشمیر کی موجودہ صورتحال، حقِ خود ارادیت اور مقبوضہ کشمیر میں بھارتی اقدامات کے مختلف پہلوؤں پر روشنی ڈالنے کے لیے سیمینار منعقد کیا گیا، جس سے مقررین نے خطاب کیا۔

تقریب میں ایڈیشنل ڈپٹی کمشنر جنرل محمد وسیم، ضلعی افسران، مختلف محکموں کے نمائندگان، سول سوسائٹی، طلبہ اور شہریوں کی بڑی تعداد نے شرکت کی۔

بعد ازاں میونسپل کمیٹی ہال سے رفیق شاہ چوک تک یکجہتی کشمیر ریلی نکالی گئی، جس میں شرکاء نے پاکستان اور کشمیر کے پرچم اٹھا رکھے تھے اور کشمیری عوام سے اظہارِ یکجہتی کے حق میں نعرے لگائے۔ شرکاء نے اس عزم کا اظہار کیا کہ کشمیری عوام کی منصفانہ جدوجہد کی حمایت ہر سطح پر جاری رکھی جائے گی اور ان کے بنیادی حقوق کے حصول تک پاکستان اپنی سیاسی، سفارتی اور اخلاقی حمایت جاری رکھے گا۔