پٹرولیم مصنوعات سستی، مگر عوام کو ریلیف نہ مل سکا، مہنگائی برقرار

ضلعی انتظامیہ، ڈپٹی کمشنرز، اسسٹنٹ کمشنرز اور پرائس کنٹرول مجسٹریٹس مارکیٹ میں حکومتی ریلیف عوام تک پہنچانے اور قیمتوں پر مؤثر عملدرآمد یقینی بنانے میں ناکام دکھائی دیتے ہیں۔

بہاولنگر: وفاقی حکومت کی جانب سے پٹرولیم مصنوعات کی قیمتوں میں نمایاں کمی کے باوجود ٹرانسپورٹ کرایوں، تعمیراتی سامان اور روزمرہ استعمال کی متعدد اشیائے ضروریہ کی قیمتوں میں خاطر خواہ کمی نہ ہونے پر شہریوں نے ضلعی انتظامیہ کی کارکردگی پر سوالات اٹھا دیے ہیں۔

شہریوں کا کہنا ہے کہ جب پٹرولیم مصنوعات کی قیمتوں میں اضافہ ہوا تھا تو بسوں کے کرایوں، مال بردار ٹرانسپورٹ، سریا، سیمنٹ، بجری، اینٹوں اور دیگر تعمیراتی سامان سمیت مختلف اشیاء کی قیمتوں میں فوری اضافہ کر دیا گیا تھا۔ تاہم اب جبکہ پٹرولیم مصنوعات کی قیمتیں سابقہ سطح سے بھی کم ہو چکی ہیں، ان اشیاء اور خدمات کی قیمتوں میں کوئی نمایاں کمی دیکھنے میں نہیں آئی۔

عوامی حلقوں کے مطابق ضلعی انتظامیہ، ڈپٹی کمشنرز، اسسٹنٹ کمشنرز اور پرائس کنٹرول مجسٹریٹس مارکیٹ میں حکومتی ریلیف عوام تک پہنچانے اور قیمتوں پر مؤثر عملدرآمد یقینی بنانے میں ناکام دکھائی دیتے ہیں۔

شہریوں نے وزیراعظم پاکستان اور وزیراعلیٰ پنجاب مریم نواز سے مطالبہ کیا ہے کہ وہ صورتحال کا فوری نوٹس لیں، اشیائے ضروریہ، ٹرانسپورٹ کرایوں اور تعمیراتی سامان کی قیمتوں میں مناسب کمی یقینی بنانے کے لیے متعلقہ اداروں کو ہدایات جاری کریں، جبکہ غفلت یا لاپرواہی کے مرتکب افسران کے خلاف قانون کے مطابق کارروائی عمل میں لائی جائے۔