کمشنر اورآر پی اوبہاولپورڈویژن کایوم عاشور کے موقع پرڈویژن بھر کےمختلف شہروں کا دورہ

بہاولنگر: کمشنربہاولپورڈویژن عرفان علی کاٹھیا و آر پی اوبہاولپورڈویژن غازی صلاح الدین نے کہا ہے کہ محرم الحرام کے دوران امن و امان کا قیام حکومتِ پنجاب کی اولین ترجیح ہے جبکہ امن کمیٹی، علماء کرام، انجمن تاجران، جلوس و مجالس کے منتظمین، صحافی برادری اور شہریوں نے امن و امان کے قیام اوربھائی چارے کی فضا برقرار رکھنے کے لیے انتظامیہ کے ساتھ بھرپور تعاون کی مثال قائم کی ہے۔انہوں نےڈپٹی کمشنربہاولنگر ذوالفقار احمد اور ڈی پی او محمد عمران کے ہمراہ ضلع بہاولنگر کے مختلف شہروں میں یوم عاشور کے موقع پرجلوسوں، امام بارگاہوں اور جلوسوں کے روٹس کا تفصیلی جائزہ لینے کے دوران مزید کہا کہ تمام جلوسوں، مجالس اور حساس مقامات کی مسلسل نگرانی جاری رکھی جائے اور کسی بھی ہنگامی صورتحال میں فوری اور مؤثر کارروائی کو یقینی بنایا جائے۔

انہوں نے سیف سٹی کنٹرول روم، ڈی سی آفس کنٹرول روم اور ڈی پی او آفس کنٹرول روم کا تفصیلی دورہ کیا۔ انہوں نے سی سی ٹی وی کیمروں کے ذریعے جلوسوں اور مجالس کی لائیو مانیٹرنگ، جدید نگرانی کے نظام، کمیونیکیشن سسٹم، ایمرجنسی رسپانس، پولیس اور دیگر اداروں کے درمیان رابطہ کاری کے انتظامات کا جائزہ لیا۔ڈویژنل و ضلعی افسران نے جلوسوں کے ہمراہ پیدل چلتے ہوئے سیکیورٹی انتظامات، داخلی و خارجی راستوں، واک تھرو گیٹس، میٹل ڈیٹیکٹرز، سی سی ٹی وی کیمروں، سرچ اینڈ سویپ، ٹریفک مینجمنٹ، ریسکیو سروسز، طبی کیمپس، صفائی ستھرائی، لائٹنگ، پانی کی سبیلوں اور لنگر کے انتظامات کا باریک بینی سے جائزہ لیا۔ اس موقع پر جلوسوں کے راستوں پر قائم مختلف پانی کی سبیلوں کا بھی دورہ کیا گیا، منتظمین سے ملاقات کی گئی اور عزاداروں کو فراہم کی جانے والی سہولیات کا معائنہ کرتے ہوئے بہترین انتظامات پر منتظمین کو سراہا گیا۔اس موقع پرریسکیو 1122، سول ڈیفنس، محکمہ صحت، بلدیہ، متعلقہ محکموں کے افسران،ممبران امن کمیٹی، علماء کرام، انجمن تاجران اورمیڈیا نمائندے بھی موجود تھے