بہاولنگر میں ریلوے پھاٹک کے قریب دکان میں سلنڈر دھماکہ، 9 افراد شدید زخمی

بہاولنگر: بہاولنگر میں ریلوے پھاٹک کے قریب ایک دکان میں سلنڈر دھماکے نے ہلچل مچا دی، جس کے نتیجے میں 9 افراد شدید زخمی ہو گئے۔ دھماکہ اتنا زوردار تھا کہ دکان میں موجود افراد آگ سے جھلس گئے اور افراتفری پھیل گئی۔ اطلاعات کے مطابق زخمیوں میں دکان دار اور گاہک شامل ہیں، جنہیں فوری طور پر طبی امداد کے لیے ڈسٹرکٹ ہسپتال بہاولنگر منتقل کر دیا گیا ہے۔

ریسکیو ٹیموں نے جائے وقوعہ پر پہنچ کر آگ پر قابو پالیا اور زخمیوں کو ابتدائی طبی امداد فراہم کرنے کے بعد ہسپتال روانہ کیا۔ دھماکے کی وجہ سلنڈر لیک یا لاپرواہی بتائی جا رہی ہے، تاہم پولیس نے واقعے کی مزید تحقیقات شروع کر دی ہیں اور علاقے میں خوف و ہراس کا ماحول ہے۔ زخمیوں کی حالت تشویشناک بتائی جا رہی ہے، جبکہ ہسپتال انتظامیہ نے ہنگامی صورتحال نافذ کر دی ہے۔